Internaciona Ido-renkontro dum la tempo inter la 23esma e 27esma di septembro 2005 en Toulouse

Internaciona Ido-renkontro dum la tempo inter la 23esma e 27esma di septembro 2005 en Toulouse

Inter la 23esma di septembro (arivo) e la 27esma di septembro 2005 eventis internaciona Ido-renkontro en Toulouse (Sud-Francia).
La kunveneyo esis che l' "Aumônerie du lycée Pierre de Fermat" en la centro di Toulouse, quan nia samideano Robert Pontnau aranjis por nia renkontro.

Dum venerdio, la 23.09.2005 pos l'arivo di omna partoprenanti ye 20.00 kloko eventis inaugura vespero en la kunveneyo, ube omni prizentis su.

La maxim granda surprizo esis, ke yuna interesemo lojante en Toulouse asistis nia inaugura vespero.

La partoprenanti

de sinistre a dextre:

Heidi Neußner (Germania), Wolfgang Quies (Germania), Eberhard Scholz (Germania), Vlado Yakovenko (Polonia), Alfred Neußner (Germania)

Marion Kasper (Germania), Frank Kasper (Germania), Loic Landais (Francia), Robert Pontnau (Francia), Hans Stuifbergen (Nederlando),

Vera Barandovska (Germania), Sander (Nederlando), Dieter Schmidtchen (Germania)

Plura fotografuri facita dum la renkontro trovesas hike

Ni diskutis koncerne duesma edituro di Ido-adresaro "Esez bonvenanta". Ca adresaro kontenas nomi ed adresi di Idisti, qui esas pronta gastigar altra samideani o helpar a li trovar hotelo e.c. Esis propozata, ke aparesos advoko ad omna Idisti en nia Ido-revui e ye l'interreto donar lia adresi por nia adresaro.

Esis propozita publikigar la nomi dil gastiganti sen lia adresi che la ret-situo di ULI.

Pos l'unesma laborkunsido ni juis saporoza dejuno en Arabiana restorerio.
Pose Robert Pontnau promenis kun nia tra la centro di Toulouse ed alonge la rivero Garonne.
17.00 - 18.30 kloko -duesma laborkunsido che la kunveneyo (Raporto da Eberhard Scholz pri l'aktivesi dil Ido-amiki Berlin)
Ye 19.00 kloko ni travivis festala dineo kun tipala saporoza sufranca repasti en la restorerio 'La Gaskono'.

Dum sundio, la 25.09.2005, ni dum nia duesma laborkunsido en la kunveneyo audis raporto da Eberhard Scholz pri l'aktivesi dil Ido-amiki Berlin. Nia samideano anke mencionis, ke nia samideani en Berlin diligente okupesas koncerne la enretigo e rinovigo dil existanta Germana Ido-dicionarii.

Laudesis anke la diligenta agado di Robert Carnaghan pri interreta dicionarii en diversa lingui.
Pos la laborkunsido ni vizitis la famoza pulcmerkato, qua nur funcionas sundie.
Pose ni dejunis en la restorerio "Flunch", ube on ipsa povas selektar multa modestprecala repasti.
Dum la posdimezo ni partoprenis en guidita veturo kun turistala treneto tra l'urbo.
Sequis nia finala laborkunsido.

Ni diskutis la propozo instalar nova Idala diskutforumi che "Google", pos ke "Yahoogroups" sen motivo nuligis un Idala forumo. Pro ke la majoritato dil partoprenanti ne pensas, ke existas urjanta neceseso havar plu multa interreta Ido-diskutforumi kam existas ca diskuto restis sen rezulto.

Samideano Schmidtchen ankore atencigis ni a l'Ido-konkurso aranjita dil Germana Ido-Societo depos plura yari sen regardebla rezulto e ke on devez motivizar Ido-interesemi partoprenar ofrante atraktiva premii.

Fine Eberhard Scholz propozis aranjar l'internaciona Ido-konfero 2006 dum la tempo inter la 25esma e 28esma di agosto 2006 en la Germana chefurbo Berlin.

Kun ca propozo finis l'oficala parto dil Ido-renkontro 2005 en Toulouse.
Pos komuna dineo en Turkiana restorerio nia samideano Robert Pontnau facis interesiva diskurso kun fotografuri pri lua recenta voyajo a Togo en Afrika.

Dum lundio, la 26.09.2005, ni aranjis totjorna komuna exkurso kun automobili a la mezepokala urbo Carcassonne
Pos retroveno ni ankorfoye manjis en la restorerio "Flunch" e pose adiis kun l'espero rirenkontrar okazione dil Ido-konfero dum 2006 en Berlin.

Me devas rezumar, ke me itere povis travivar agreabla dii komune kun kara Ido-amiki en agreabla rondo.

Me deziras kordialege dankar a nia samideano Robert Pontnau proi l'ecelanta aranjo dil kunveneyo e pro omna lua diligenta penadi ante e dum la konfero.

Kordiala saluti
Frank Kasper
prezidanto dil Germana Ido-Societo
kunaranjero dil Ido-renkontro 2005 en Toulouse (Sud-Francia)

La Sud-Franca urbo Toulouse, ube eventos l’Ido-konfero 2005 havas cirkume miliono di habitanti. Olu esas oldega urbo. Ja dum prehistoriala tempo jacis vilajo en la nuna loko Vieille-Toulouse.

Dum la tempo dil Romani, olu esis centro di la vinkomerco kun Gallia. Pose ol divenis l’intelektala centro di la Romana Narbona provinco. Dum la kinesma yarcento ol divenis chefurbo di la Westgotala rejolando. Ca rejolando ne duris longe e la Westgoti rapide latin- e kristaneskis. Pose venis la Franki. Pos la regno di Karl la Granda (France Charlemagne) Toulouse divenis guvernata da komti, qui plu e plu sendependeskis de la rejo. De la 9esma til la 13esma yarcento sub la dinastio di la komti Raimond l’urbo esis sideyo di un di la maxim marveloza korti di Europa. Konsuli selektata ek la komercala borgezaro, la ‘Kapituli’ (capitouls), administris l’urbo e disponis pri granda povo. Ca sistemo permisis a la richa komercisti nobeleskar. Simbolo dil nobelesko esis flankala domturmo. En ica tempo florifis l’okcitana linguo, qua esis la linguo dil Trubaduri, kortala poeti. Pos la katara krizo ed olua krucmilito on adherigis Okcitania a la Franca rejolando (1273) . (La katari esis estala religio, devenanta di la bogomili, qui propageskis en sudala Francia dum la dekedunesma yarcento) . Lore esis fino dil povo dil kapituli. Erste dum 1420 Toulouse kreis parlamento, qua okupis pri judiciado e financo.

Pos la katarala krizo Toulouse ritrovis sua artala e literaturala influo. Dum 1327 sep importanta homi, qui volis ‘durigar’ l’okcitana linguo fondis la kompanio dil ‘joya savo’ (Gai savoir) la maxim olda literaturala societo en Europa, quan la rejo Ludoviko la 14esma transformis dum 1694 aden la Akademio di la Flora Ludi (Académie des Jeux Floraux).

Dum la la dek-e-kinesma yarcento la komerco dil tintilo-planto ‘pastelo’ adportas al urbal komercisti granda richeso dum un yarcento. Sequis religiala milito, qua ruinigis la regiono.

Depos ica tempo on havas luxoza komercistala domi, quale la domi di la familii Assézat e Bernuy.(Hôtel d’Assézat , hôtel de Bernuy).

L’urbodomo nomesas Kapitol (Capitole). Hike exekutesis dum 1632 la duko de Montmorency, qua ribelis kontre la rejo Ludoviko la 13esma e la kardinalo de Richelieu, lu revis pri sendependa Sud-Francia. La populo sur la placo respondis per venjala krii , kande l’exukutisto montris ek la fenestro dil urbala domo la sangifanta kapo dil duko.

Dum l’unesma mondmilito on transportis l’aviacilala industrio a la Sudo, por ke lu esez fora de la fronto. Ico esis la komenco dil moderna aviacilala industrio. Toulouse konstruktas l’Airbus , e mem artefacita sateliti. Olu havas interesiva spacmuzeo.

La kemiala industrio sufris pro la tre mortigiva acidento, explodo dil fabrikerio AZF la 21esma di septembro 2001 (30 mortinti ed 8000 vunditi).